المناعة النفسية (Resilience)  .. 

زي ما الجسم ليهو جهاز مناعة  ..

 النفس الإنسانية كمان ليها جهاز مناعة، أحيانا بنسأل ليه واحد اتعرض لموقف بسيط و تافه في وجهة نظر بعض الناس، لكنه دخل في  اكتئاب أو إدمان أو حتى فقد قواهو  العقلية !!!

في حين واحد تاني ممكن يكون اتولد في الشارع واتعرض لكل أنواع الضغوط في الدنيا لكنه طلع قوي وانتصر على الظروف الضدو  والمثل بيقول الضربة التي لاتقتلك  تقويك ..

 لكن ليه الضربة تموت واحد ونفس الضربة أو أشد منها مع واحد تاني بتقويهو ؟!

هنا بنعرف حاجة اسمها المرونة النفسية قدام الضغوط والصلابة في مواجهة الصعوبات يعني

 المناعة النفسية(Resilience)  .. 

 عشان نفهم الصورة أوضح اخذ  كورة بينج بونج و اخذ  كورة تنس، اضغط على الاتنين بصوابعك واحدة حتتفعص وتتكسر  ..

 والتانية لأ لكن حتنضغط وترجع لوضعها الأصلي، اضرب  الاتنين بكل قوتك  في أنشف حيطة قدامك ..

 واحدة حتتكسر وتقع والتانية حترجع  بقوة في وجهك وممكن تخرب  عينك  !!!

عشان كده في واحد الضغوط بتقويهو  وواحد تاني بيتكسر، واحد يتعلم النجاح من صموده قدام 1000 محاولة فشل ..

 وواحد تاني قدام أول تهديد بإنه احتمال يفشل بيقرر ينسحب و يرفع الراية البيضاء  مستسلم قدام الفشل  !!!

في اختلافات جينية ووراثية بين البشر بتحدد درجة حساسيتهم وشعورهم بالألم، قدرتهم على البكاء ودرجة احتمالهم للإحباط، لكن في الحقيقة ما  دي كل القصة  لكن في عوامل كتير من البيئة والتربية بنمر بيها بتوصلنا للحالة بتاعت الان  سواء كورة بينج بونج هشة أو كورة تنس قوية ..

طيب اكتشفت إني كورة بينج بونج بانكسر بسهولة، هل في أمل إني اتغير و ابقى كورة تنس متينة  ؟؟؟

طبعا، وهو ده محور زيادة المتانة النفسية للشخص المرا  بضغوط أو أصبح مريض نفسي، ما كفاية إننا نعالجه من الاكتئاب أو الإدمان أو الوسواس أو الفصام لكن المهم إننا نقوي المناعة النفسية عشان ماتحصل  انتكاسة قدام أي تهديد أو خطورة محتملة في المستقبل، فركز معايا كده  عشان نفهم سوا ماهو الشي  البتقدر تعمله و تشتغل بيهو على نفسك  ؟؟؟

1.العلاقات الإنسانية .. 

العلاقات الفيها حب وقبول وتشجيع ومساندة دي من أهم عوامل المناعة النفسية، نحنا كائنات اجتماعية مستحيل نقدر  نعيش في فقاعة لوحدنا لكن جوا مجموعة، ماف بشر  فينا يقدر يكون منعزل وفي نفس الوقت قوي، طيب لو مافي  علاقات مشجعة زي دي في حياتي ماذا افعل  ؟ 

 تعمل علاقات جديدة وصداقات تسندك، وقبل ماتسأل السؤال البعدو  ح اجاوبك و أقول ليك  اعمل علاقات جديدة حتى لو كان عمرك الان  80 سنة وعمرك ماكان ليك أصحاب  ..

2.خليك مرن  ..

تعريف تانية للمناعة النفسية هي قدرتك على المرونة، إنك ما  بتقيف  لو الدنيا ما ماشية بطريقتك، اكسر المألوف واختار اختيارات مختلفة، يمكن تنفع المره دي جدد واعمل حاجات بتجربها لأول مرة، ماحتخسر  .. 

3.حدد خطط واقعية وخد خطوات واضحة لتحقيقها  ..

جزء مهم في مهارات الصلابة النفسية إنك تقدر تأكد حقوقك من غير ماتبقى عنيف أو سلبي وخانع، حدد انت عاوز إيه و إيه الإمكانية المتاحة في الواقع وخد خطوة، ماتقول  نفسي أعمل ونفسي اكون وماتضحك على نفسك بأحلام اليقظة، لكن خد تحدي واضح و ابدأ في الكورس أو الرياضة أو المهمة ال انت عمال تأجلها ليك  سبع سنين  ..

4.اتواصل بفاعلية مع الناس، واتعلم تحل المشكلات لوحدك ووسط فريق  .. 

مهارة مهمة جدا جدا جدا، اننا نتواصل.. نسمع بعض.. نتبادل الاراء ونشوف المشكلة ونحاول نحلها سوا، انضم لفريق، العمل جوا فريق حتى لو ما  أصدقاء بمعنى الكلمة لكنه بيساعدني جدا إني أفهم واتفهم و احل مشاكلي ومشاكل الفريق واحنا مع بعض ..

5.اتعلم تدير مشاعرك  .. 

اعرف انت حاسس بشنو الان  عشان تعرف تحترم مشاعرك كويس وتقدر تركنها على جنب لحد ماتفكر، جزء مهم في المناعة النفسية هي مهارة إدارة المشاعر والتحكم في النزعة المندفعة و الانفعال والغضب، يعني لما تبقى شايط وغضبان أو موجوع جدا احترم مشاعرك واركنها على جنب قبل ماتاخد أي قرار ممكن يخليك تخبط في الحلل في لحظة غضب  ..

6.خليك واثق في نفسك .. 

عارف انه ما بالساهل، لكن لما تعرف تشوف نفسك بشكل إيجابي حتقدر تعافر وتواجه قلقك و تعبك، لما تخرج وتساعد حد محتاج ليك وتكتب جوانب قوتك لما تفكر نفسك بخبرات نجاحك في الماضي حتعرف تواجه وتصمد وتكمل حتى لو النجاح لسه ما  واضح ..

7.ابحث عن هدف ومعنى  ..

جزء مهم في المناعة إنك تطلع برة دايرة الأحداث الصادمة وتنظر للهدف الروحي والمعنى الديني وسط الألم، إنك تبقى عندك مبادئ مؤمن بيها وعايش بيها حتى وسط المحن وحتى لو مافي زول  شايفك ..

8.ركز  على الصورة الكبيرة ..

النقطة دي مرتبطة بالكلام ال في النقطة 5 و7 ، كادر الحياة عامل زي صورة مصنوعة من الفسيفساء، مليانة تفاصيل وفيها الأبيض والأسود والألوان، ماتتزنق  في تفصيلة صغيرة وتقيف  على نفسك أو على الناس لأن الصورة الكبيرة هي الفيها المعنى الكامل، أوعى تدبس في لعبة اللوم ومين الغلطان لأن ماف زول بيطلع منها كسبان، لا ماتعاين  لغيرك كمتهم إنه دمر حياتك خلاص بسبب موقف عمله معاك، ولا تلوم نفسك إنك عملت غلطة بالفورة كلها وإنك مسئول عن كل كوارث كوكب الأرض، الصورة الكبيرة بتبلع كل التفاصيل بحلوها ومرها، المهم نتعلم ..

9.اتعلم تستخدم المرح وتقدره ..

أحيانا بيسموها الكوميديا السوداء، لكن حتى وسط الوجع تقدر تقف على أطلال بيتك المهدوم بعد ما اتحرق وتعرف تقول نكتة وانت موجوع، الضحكة في الأوقات دي ممكن يبقالها مفعول السحر وساعتها تقدر تبني بيت أجمل و أصلب بكتير من العشة ال اتهدمت، بس عشان سمحت لنفسك تضحك على الوجع ..

10.خد بالك من نفسك ..

ممكن نضحك على النقطة دي، آخد بالي من نفسي كيف  ؟؟؟

راعيها واهتم بيها سواء برياضة أو دايت أو هواية ممتعة، خصوصا الناس المشغولين يساعدوا غيرهم وبينسوا انهم زي باقي البشر بيتعبوا و بيمرضوا وبيكتئبوا وبيحسوا بالملل، خد بالك من نفسك لأنك ما حتكسب حاجة لو أحييت العالم كله وقتلت نفسك  !!!

11.قدم الرعاية للغير ..

عشان احنا ما مخلوقين لذواتنا، فعمرنا ماحنكون أقويا غير لما نقدم الرعاية والسند جسديا ووجدانيا، إني أطلع برة دائرة نفسي وأنانيتي وأقدم رعاية لحد محتاج بدون مقابل، ممكن يكون عمل تطوعي أو خيري أو عمل بساعد فيهو  إنسان تاني و اشعر فيهو  بمعاناتو ، عمل ما  مستني فيهو  مكافأة من بشر ولا حتى طمعان في الثواب من ربنا، القصة ما مقايضة لكن عمل مدفوع بالحب.. 

شوفتوا  المناعة النفسية ما مجرد جينات ولا تربية ولا ظروف حوالينا، المناعة النفسية هي اختيار كل يوم أنا البقرر أعيشه كيف ، زي كورة البينج بونج ولا زي كورة التنس  !!!