لو انت شاب ولسه متخرج أو لسه شغال جديد

او متجوز جديد

بتمسك مرتبك وتقسمه نصين ٥٠٪ و ٥٠٪

- اول ٥٠٪ بتقسمها كالاتى :

١٠٪ صدقة :

( يسألونك ماذا ينفقون قل ما أنفقتم من خير فللوالدين والأقربين واليتامى والمساكين وابن السبيل) الاولويه للوالدين اذا كانوا محتاجين مساعدتك ثم الاقربون

.

١٠٪ ادخار مدى الحياه :

وهنا دى هتاخدها مدى الحياه ومش هتقرب منها إلا للضروره القصوى لما تفلس مثلا او هتتسجن علشان فلوس والمفروض تروح لاولادك فى الاخر

.

١٠٪ استثمار :

ودى بتجمعها كل سنه وتحاول تعمل بيها مشروع صغير او تدخل شريك أو تكبر مشروع قديم او تشترى دهب وتبيعه لما يغلى

أن شاء الله تجيب خروفين وتبيعهم بعد سنه المهم استثمار يعنى فلوس بتجيب فلوس والاستثمار دا بيزود الدخل فا تحسبها تانى كل سنه

.

١٠٪ تنمية ذاتية :

ودى بتكون لحضرتك يا فندم تاخد بيها كورسات انجليزى أو كورس خاص بمجالك أو تشترى بيها كتب تقرأها أو تحضر بها مؤتمر مهم أو تسافر بيها لحاجه مهمه مش للمصيف

.

١٠٪ للتسلية :

ودى بقى تخليها مكافآت لنفسك لما تنجز حاجه حلوه فى يومك أو شغلك او اى حاجه كويسه تاخد منها وتاكل اكله حلوه او تتفسح أو تروح دريم بارك او تدخل سينما ولازم تصرفها متخليهاش لان دا بيعزز من نفسك وبيشجعها تعمل فلوس اكتر

.

تانى ٥٠٪ دى بقى المصروفات وتشمل

اكل وسكن ( لو ساكن بعيد عن اهلك ) مواصلات او بنزين لعربيه لو عندك ومصاريف بيتك لو متجوز ومخلف

لو عامل جمعيه تدفع منها وهكذا المهم تدبر فلوسك بحيث أن نص فلوسك اللى بتدخلك في الشهر تكفى الحجات دى

________________

طيب لو انت بقى مرتبك يا دوبك بيكفيك وبيكفى مصاريفك وبيتك لو متجوز يبقى لازم لازم :

١- تزود مصادر الدخل يعنى تشوف اى شغلانه تانيه غير الشغلانه الاولى او افتح مشروع صغير او تدور على اى استثمار على النت المهم تتشقلب وتزود مصدر تانى وتالت لحد سادس مصدر للدخل حتى لو بيدخلولك مبالغ صغيره بس مع التنوع ومع الاستمرارية هتلاقى معاك فلوس كتيره .

٢- لازم تحدد نفقاتك ومصروفاتك وتعرفها كويس بمعنى انك لازم تحط ميزانيه للاكل والمواصلات واللايجارات ومتطلعش عنها وتحاول لو هى كبيره واكبر من نص دخلك تقلل منها لحد ما توصل اقل من النص وكل ما يزيد دخلك ما تزودش نفقاتك

٣- لو عليك ديون حطلها ٥٪ من حساب التسليه بتاعك ووزعها واخلص منها ومتجيش على حساب الاستثمار أو الادخار .